Le Syndrome de Paris (First version) from Raphaël GEORGE on Vimeo.

Ang Sakit ng Paris

Binibigyang-diin ng maikling dokyumentaryong ito ang isang bagay na karaniwa’y nalilimutan ng mga tao. Karamihan ng mga turistang dumadayo sa Paris – mga Amerikano, mga Ingles, mga Asyano at iba pa – ay nakatuon lamang ang pansin sa kagandahan at alindog ng nasabing lugar. Oo nga naman, hindi sila maaring masisi, sapagkat ang Paris ay tunay na napakaganda. Mistulan itong paraiso para sa mga turista – mga monumento, mga maingay na kalsada, mga usong damit, mga pagkain at marami pang iba!

Ngunit ang ipinaalala ng bidyo sa amin ay ang mga taong nagtatrabaho sa likod ng mga magagandang tanawing ito. Syempre maraming magagandang tanawin at atraksyon sa Paris, subalit ano’ng mangyayari kung wala ang mga taong nag-aalaga sa mga ito? Sinu-sino ang mga manggagawa at trabahador na nasa likod ng buhay sa Paris? Nakatatanggap ba sila ng mainam at sapat na sweldo para sa kanilang pagtatrabaho? Sila ba’y nabibigyang-importansya para sa kanilang pagsisikap?

Ipinaaalala sa atin ng bidyong ito ang mga construction workers, ang mga nagwawalis sa kalsada, ang mga panadero, ang mga karpintero, at lahat ng mga manggagawang madalas nating makalimutan. Naniniwala kami na ang tunay na kayamanan ng kaibig-ibig na lugar na ito ay ang mga taong naninirahan dito.

Hindi ito naiiba sa nangyayari dito sa Pilipinas. Masyadong naka-pokus ang mga tao sa kani-kanilang mga buhay, at hindi nila nabibigyang-pansin ang mga manggagawang nagtatayo ng ating mga bahay, nagpipintura sa mga pinto, gumagala sa mga kalsada upang magbenta ng dyaryo, nag-aayos ng plumbing at nag-lalaba ng ating mga damit.

Naniniwala kaming panahon na upang kilalanin natin ang pagsisikap at pagsasakripisyo ng ating mga manggagawa hindi lamang tuwing Labor Day, kundi pati araw-araw.

Sa aming palagay, maganda at epektibo ang dokyumentaryo. Iminulat nito ang aming mga mata sa katotohanan. Mayroon rin itong kakaibang perspektibo sapagkat mga Hapones ang nagku-kwento nito. Masyadong dramatiko ang tugtog, ngunit ang kalidad ng bidyo ay maayos.